Հայաստանի Հանրապետութեան 27-րդ տարեդարձին առթիւ

Yerag Ramgavar

 

Հաւատքով եւ երազով … Այսօր անգամ մը եւս սէգ հասակներով ու հպարտ հայեացքով կ՚ուխտենք քալել Հայաստանի անկախ ճանապարհէն

 

Բախտորոշ ժամանակներ կ՚ապրինք։ Մեր Հայաստանը այսօր կը նշէ իր անկախութեան 27 -րդ տարեդարձը։

 

Մեր անդամութեան մաս կազմողներէն շատերը տակաւին նոր կենաքի շեմ մտած էին, երբ երկիր Հայաստանը հռչակեց իր անկախութիւնը, նոր յոյս եւ լուսատու ջահ դառնալով նաեւ աշխարհասփիւռ հայութեան։

 

Յոյս, որ միասին պիտի կերտենք մեր երազներու երկիրը ու  դառնալով ջահ յանուն հայութեան մեծ երազներուն, որոնց համար մեր նախնիները պայքարած  էին երկար տարիներ։

 

Հաւատարիմ մեր կուսակցութեան՝ ՌԱԿ-ի դաւանած գաղափարներուն ու հեռու մնալով հայութիւնն ու հայրենիքը տարանջատող երեւոյթներէն, որդեգրեցինք մէկ սկզբունք ու դաւանեցինք մէկ գաղափար։ Ըսինք ու հաւատացինք, որ Հայաստանը ամէն բանէ վեր է ու անոր վարդահեղեղ առաւօտը ուր որ է պիտի գայ։

 

Նորէն ոտքի պիտի կանգնի մեր երկիրը ու յանուն ազատութեան ու արդարութեան հայ ժողովուրդը անգամ մը եւս լսելի պիտի դարձնէ իր ձայնը։

 

Այսօր ահա այդ երազը հասած է նոր փուլի մը եւ մեր ժողովուրդի ամենանուէր ճիգերուն շնորհիւ Հայաստանի «թաւշեայ յեղափոխութիւն»ը բոլորած է կարեւոր հանգրուան մը։

Կան կարեւոր ընելիքներ ու յստակ է նաեւ, որ սփիւռքի տարածքով մէկ սփռուած մեր երիտասարդ ընկերներով, նոյն հաւատքով ու նոյն հաւատամքով տոգորուած կը նայինք դէպի  ապագայ։

 

Տագնապներու զառնուած, տնտեսական բարդ դրութեան մատնուած, արտագաղթի վէրքով արիւնող Հայաստանը այսօր նոր իրավիճակի մը ականատեսն է։ Ոտքի է Հայաստանը եւ անոր վարակիչ երազը կը տարածուի ամէն դի։

 

Սփիւռքի մէջ եւս հայութիւնը, հայ երիտասարդութիւնը կ՚ապրի ու կ՚արարէ յանուն  այդ յեղափոխութեան։

Սփիւռքի տագնապներն ալ կը սպասեն իրենց լուծման ու ինչպէս երէկ, այսօր եւս Հայաստանը դարձած է իրական ուղեցոյց մեր նոր ճանապարհներուն համար։

 

Մեր փափաքն է, որ լիարժէք դարձած անկախ Հայաստանի շունչը,  բոլոր՝ տեսակի վերքէրէն մաքրուելու ու նորանալու բնազդը նաեւ վարակիչ դառնայ աշխարհասփիւռ հայութեան համար, որ երկար ժամանակէ ի վեր կը սպասէր այս  պատմակերտ օրուան։

 

Որպէսզի մեր երազն ալ դառնայ իրականութիւն, 

Որպէսզի մեր հաւատքն ալ  դառնայ ամբողջական՝ այս երազին ու այս հողին։

 

Այսօր անգամ մը եւս սէգ հասակներով ու հպարտ հայեացքով կ՚ուխտենք քալել Հայաստանի անկախ ճանապարհէն։

 

Մեր սրտին բոց, մեր հոգիին՝ կրակ եւ յարգանք ու խոնարհում՝ յարգելու յիշատակը մեր բոլոր նահատակներուն, կ՚ուխտենք այսօր ապրիլ Հայաստանի անկախութեան հաւատամքով։

 

Կեցցէ՜ հայ  ժողովուրդը,

Կեցցէ՜ 27 տարեկան անկախ Հայաստանի Հանրապետութիւնը

Կեցցէ՜ Երիտասարդ Ռամկավարները

 

 

 


Leave a Reply




Join Now