«Թաւշեայ Յեղափոխութեան Բերած Նոր Արժէքները Եւ Սփիւռքը». ԵՌԱԿ-ի Կազմակերպութեամբ Քննարկում-Զրոյց

ԵՌԱԿի Կազմակերպութեամբ

ԵՌԱԿ-ի Կազմակերպութեամբ «Թաւշեայ յեղափոխութեան բերած նոր արժէքները  եւ սփիւռքը» թեմայով հետաքրքրական քննարկում-զրոյց մը տեղի ունեցաւ Կիրակի, 28 Հոկտեմբեր 2018-ին, Երեւանի « Թէքէեան Կեդրոն»ին մէջ, մասնակցութեամբ հայաստանաբնակ՝ սփիւռքահայ եւ տեղացի հայ երիտասարդներու: 

 

ԵՌԱԿի Կազմակերպութեամբ

 

Հանդիպումի մեկնարկին Ընկ. Անի Չալեան ԵՌԱԿ-ի անունով ողջունելով ներկաները, սեղմ գիծերու մէջ ներկայացուց օրուան բանախօսները եւ ձեռնարկը բացուած յայտարարելէ առաջ, խօսքը տուաւ ՌԱԿ-ի Փոխատենապետ Ընկ. Լեւոն Պըլըխեանին:

 

ԵՌԱԿի Կազմակերպութեամբ

 

Բարի գալուստի խօսքը արտասնելով, ՌԱԿ-ի Փոխատենապետը կարեւորեց հայրենիքի մէջ վերջին շրջանին իրականացող զարգացումներուն մէջ երիտասարդութեան դերը եւ շեշտեց, որ այդ առումով մեծ ակնկալիքներ ունին նաեւ սփիւռքի երիտասարդութենէն,  յատկապէս, որ ներկայիս աւելի յարմարաւէտ պայմաններ կը տիրեն թէ՛ հայրենիքի, թէ՛ սփիւռքի մէջ, հետեւբար երիտասարդութիւնը պէտք է աւելի աշխուժանայ եւ միասնաբար աշխատի յստակ ուղղութեամբ մը՝ հայրենիքի բարօրութեան եւ սփիւռքի ճիշդ ընթացքին համար: Ան խօսքի աւարտին յաջողութիւն մաղթեց ներկաներուն, յուսալով, որ նման շահաւէտ հանդիպումները շարունակական բնոյթ կը կրեն եւ լաւ արդիւնքներու կը յանգին: 

 

Այնուհետեւ, ընթացք առաւ յայտագիրը:

 

ԵՌԱԿի Կազմակերպութեամբ

 

«Թաւշեայ յեղափոխութեան բերած նոր արժէքները» թեմայով հանդէս եկաւ օրուայ առաջին հիւր բանախօսը՝ ՀՀ ԳԽ նախկին պատգամաւոր, քաղաքագէտ Ընկ. Վիգէն Խաչատրեանը: Ան զանց առնելով արդէն բոլորին յայտնի Թաւշեայ յեղափոխութեան երեւացող երեւոյթները՝ ինչ կատարուեցաւ, ովքեր մասնակցեցան եւայլն, շեշտը դրաւ խորքային եւ առաջին հայեացքով չնկատուող երեւոյթներուն վրայ:

 

ԵՌԱԿի Կազմակերպութեամբ

 

Դասախօսը հակիրճ ակնարկով մը ներկայացնելէ ետք Հայաստանի  հասարակութեան ապրած երեք յեղափոխութիւններէն առաջին երկուքի պատմութիւնը եւ ժողովուրդի համար անոնց բերած լուծումներու անբաւարարուածութիւնը, հիմնաւորեց թաւշեայ յեղափոխութեան հասունացման հանքամանքները: Ան ըսաւ, որ իր համար անխուսափելի էր եւ երբեք զարմանալի չէր Հայաստանի մէջ տեղի ունեցած յեղափոխութիւնը, բայց անսպասելին անոր այսքան շուտ հասուննալն էր, որովհետեւ ըստ երեւոյթին, նոր սերունդը աւելի համարձակ եւ շտապող եղաւ արժանապատիւ ապրելու իր պահանջքին մէջ:

 

ԵՌԱԿի Կազմակերպութեամբ

 

Այնուհետեւ բանախօսը հանգամանալից կերպով ներկայացուց բոլոր այն արժէքները, որոնք պէտք է հաստատուին Նոր Հայաստանի մէջ եւ որոնց համար գիտակից եւ պահանջատէր պէտք է ըլլայ հասարակութիւնը:

 

ԵՌԱԿի Կազմակերպութեամբ

 

Կարճ դադարէ եւ հիւրասիրութենէ մը ետք ընթացք առաւ յայտագրի երկրորդ բաժինը:

 

Զրոյցի երկրորդ թեման կը կրէր «Թաւշեայ յեղափոխութիւնը եւ սփիւռքը» խորագիրը, որ ներկայացուց օրուան երկրորդ բանախօս, Կիպրոսէն հիւրաբար Երեւան գտնուող սփիւռքահայ մտաւորական, հրապարակախօս, ազգային գործիչ Ընկ. Ասատուր Տեվլէթեանը:

 

ԵՌԱԿի Կազմակերպութեամբ

 

Դասախօսը մտերմիկ եւ իւրայատուկ ոճով շուրջ մէկ ժամ խօսեցաւ Թաւշեայ Յեղափոխութեան լոյսին տակ հայրենիքի մէջ պարզուած նոր իրականաութեան մէջ Սփիւռքի ունենալիք կարեւոր դերի մասին:

 

ԵՌԱԿի Կազմակերպութեամբ 1

 

Ընկ. Տեվլէթեան պատմութենէն օրինակներ թուարկելով, հիմնաւորեց, որ յեղափոխութեան երեւոյթով սկիզբ կառնէ դրական փոփոխութիւններու ընթացքը, բայց անոր շարունակութիւնը կ’երաշխաւորուի միայն ժողովուրդին ցանկութիւններով, ունակութիւններով եւ պատրաստակամութեամբ, շեշտելով, որ այդ ցանկութիւններն ալ պէտք է ըլլան իրապաշտ եւ տրամաբանութեան սահմաններուն մէջ: Անոր կարծիքով, Թաւշեայ յեղափոխութիւնը ցանկութիւններով հարուստ մարդիկ մէջտեղ բերած է, սակայն այդ ցանկութիւնները իրագործելի պիտի ըլլան ժողովուրդին ջանքերով, որմէ անմասն չէ անշուշտ Սփիւքը. «Այս մեր երկիրն է, մեր ժողովուրդն է, հոս կրնանք չբնակիլ, բայց մեր բոլոր իղձերը, երազները, յոյսերը այս հողաշերտին հետ պայմանաւորուած են»,- ըսաւ ան:

 

ԵՌԱԿի Կազմակերպութեամբ

 

Դասախօսը նաեւ ընդգծեց, որ Սփիւռքը, յատկապէս երիտասարդութիւնը վերջին 7-8 ամիսներու ընթացքին շատ լաւատես ակնկալութիւններով իր հայեացքը ուղղած է Հայաստանին, որովհտեւ նոր լոյս մը սփռուած է անոնց մտածելակերպին մէջ: Ան նաեւ շեշտեց, որ Հայաստանն ալ իր հերթին իսկապէս կարիքը ունի սփիւռքի կենսափորձին, գիտելիքներուն, բայց թէ այդ կենսափորձը եւ գիտելիքները որքանով առիթ կ’ունենան Հայաստանի մէջ արմատաւորուելու, ճիւղաւորուելու, պտուղ տալու՝ անպիղծ իշխանութեան տրամադրութիւններէն, հասկացողութենէն եւ թոյլտուութենէն կախում ունի:

 

ԵՌԱԿի Կազմակերպութեամբ

 

Իւրաքանչիւր թեմայի աւարտէն ետք, բանախօսները պատասխանեցին ներկաներու հարցումներուն, տեղի ունեցաւ օգտաշատ զրոյց:

 

Հանդիպումը բացառիկ առիթ եղաւ Հայաստանի մէջ տեղի ունեցած համաժողովրդական շարժման շուրջ երիտասարդութեան տեսակէտերու փոխանակման, ինչպէս նաեւ Հայաստանի նկատմամբ սփիւռքի մէջ որդեգրուած նոր մօտեցումներու ու համագործակցութեան ուղիներու քննարկման առումով: Նշենք, որ հանդիպման իրենց մասնակցութիւ ը բերին նաեւ ՌԱԿ-ի Կեդրոնական վարչութեան անդամներ՝ Ընկ. Վարդան Ուզունեանը (Լոնտոն), Ընկ. Յակոբ Անդրէասեանը (Երուսաղէմ) եւ Ընկ. Բարդուղ Գալստեանը (Արցախ):

 

Տակաւին կ’անդրադառնանք։

 


Leave a Reply




Join Now